Col 1 | MHL | STEP | Yo Pol-ke yena emar Timoti ikos ni Kolosi parosifa fain nia siisimomimik. Yo Yeesus Krais aposel-ke, ne Mua Maneka ona kookalowa-pa Krais uuwowa nain yo efa pepekimok, yo mua nain. Aria ni eena unow onaiya Mua Maneka teeria wiar ikeman, ne ni Krais baliwep ookam-ikaiman nain i feenap nia maimik, yiena Auwa Mua Maneka-ke nia kemalep nia asipami kema sonom eliwa niinok.

Colossians 1

1 Yo Pol-ke yena emar Timoti ikos ni Kolosi parosifa fain nia siisimomimik. Yo Yeesus Krais aposel-ke, ne Mua Maneka ona kookalowa-pa Krais uuwowa nain yo efa pepekimok, yo mua nain. Aria ni eena unow onaiya Mua Maneka teeria wiar ikeman, ne ni Krais baliwep ookam-ikaiman nain i feenap nia maimik, yiena Auwa Mua Maneka-ke nia kemalep nia asipami kema sonom eliwa niinok.

Wi Yeesus teeria-pa wiar ikok sira eliwa imenamik

3 I opora feenap niar miimamik, ni Yeesus Krais opor eliwa wiar miimap kekanowa naap opap ikaiman, ne ni ona teeria unowa nain pun niam kookaliman. Muuta nain i yiena Maneka Yeesus Krais ona Wiawi Mua Maneka faremi sira eliwa naakimik. 5 Ni iiriw Yeesus Krais opor eliwa eena opor makena nain nia maakiwkin miimap ikeman. Ne Mua Maneka eena maa eliwa owow iinan-pa nia wuap-puomak nain pun miimap amisarep ikeman. Ne ni nain makena-ke naep arewami kema suuwam-ikaiman. 6 Naapeya ni sira eliwa imeniman, ne ni unowa pun opora nain miimap opaman. Ni Yeesus Krais opor eliwa wiar miimap Mua Maneka nia asipiya nain maken akena amisareman. Sira naapiw miiw unowa opor eliwa nain manekareya owow unowa miimap makena-ke naep ookimik. Neeke sira eliwa wiar imenariya. 7 Iiriw Epafras-ke Yeesus Krais opor eliwa nain nia maakeya ni amisarep ikeman. O yena uuwow epaskun eena yena kookaliyem, ne Krais uuwowa baliwep uuwomiya, mua nain. I Krais opor eliwa nia maakowa nain os-ke yia asipap ikiwep nia maakek. 8 Ne ni niamiya ikok ekapemi feenap yia maakek, wi Yeesus Krais teeria epaskun arep manek akena wiam kookalimik, naap nia maek.

Pol Mua Maneka farek, wi Kolosi wia asipinok naep

9 Aria ni sira eliwa oniman nain niar miimap i kema suuwam-ikaimik. Naapeya anane Mua Maneka nia asipam-ikainok naep farimik. Feenap, Ewar Eliwa-ke amis eliwa, sira nieya kema-pa maneka niar imenareya o sira kookaliya nain amisarep wiar ookam-ikowen. 10 Ne yiena Maneka unum manek akena ikainok naep sira makena-pa ikowen. Ni naap onami anane ona kookalowa wiar ookami sira eliwa unowa onowen. Naeya ni Mua Maneka amisarowen, ne amisa nain naap niar manekaremi ikim-ikainon. 11 Ne pun Mua Maneka faremi feenap nokarimik, ona kekanow maneka-pa ni nia kekanoweya ni eliw kekanep pina akuawowen. Naap ikok ni kekanep kekelka ikowen. 12 Ne naap kema eliwiw ikok yiena Auwa sira eliwa naakem-ikowen. Os-ke ona teeria-pa nia wueya ni ikoka owow dubila melin eliwa neek ikiwep maa ele-eliwa nia wuap-puomak nain makena urufowen. 13 I Satan wapena-pa wiar ikemkun os-ke yia aawep ona Muuka kemena-pa yia wueya i eliwa ikemik, Muuka eena manek akena kookaliya nain. 14 I pina-ke yia wasieya ikemkun Muuka nain-ke i umowa epak nain wame wuami yia aaweya i eliwa ikaimik. O naap oneya Mua Maneka-ke i pina yiar iirarek.

Krais sira ne ona uuwowa

15 I Mua Maneka mokok onaiya me urufimik. Nain ona Muuka Yeesus Krais urufap maimik, i Mua Maneka fan urufimik. O Mua Maneka epaskun ikua. Os-ke iperowa arep maa unowa Mua Maneka onomakek nain onamiarek. 16 Moram Mua Maneka Muuka kuisow nain ikos maa unowa onomakemik, eena iinan maa me urufimik nain ne miiwa-pa maa urufimik nain, ne wi ensel, wi owow saria, wi anim onoma, ne wi woos mua, wi teeria kekanowa onaiya ikemik nain. O Muuka nain naep wi wia wuomakek ne Muuka nain-ke wia urufam-ikainon. 17 Iiriw miiw maa muutitik me onowa ikaeya Muuka nain ona iiriwiw ikua. Naapeya maa unowa nain aakisa os-ke urufam-ikaeya anirap ikomakek. 18 Os-ke miimeya maa muutitik o tepak-pa ikua. Naapeya i ona teeria o mia ara-ke, ne woosa os-ke ikua. Ona teeria maa muutitik onoma os. Ne o kiikir akena umep iikirak. 19 Moram Mua Maneka ona kamenap ikua nain ona kookalowa-pa Muuka mia-pa wuak nain ona Wiawi pepek akena arek. 20 Ne Muuka-ke era eepeya miiw maa unowa ne iinan maa unowa kiiriw yena efar ekapuk naep Muuka sesekak. Ne Mua Maneka ona kookalek naap Krais nomokow moke-pa umemi aka sawikak. Naeya i o irewap ikemik nain kiiriw yia aawok.

21 Ni iiriw sira samo-samora onaman nan Mua Maneka epasia-pa wiar ikeman, ne mikikira iwem-ikeman. 22 Nain aakisa Krais ona mia wame wuami nomokow moke-pa umok. Muut nain Mua Maneka-ke nia irewow marew nia aawep ona wameiya-pa nia wuak. Naeya ni aakisa o mokoka-pa dubil muuta ikeman, opor marew ne pina marew ikeman. 23 Nain ni opor eliwa baliwep opami kekanep ikowen-na eliw. Oko ni kema gariarep eena iiriw opor eliwa miimap opap ikeman nain piipuowen. Opor eliwa fain miiw unowa owow unowa-pa wia maakem-miawiwkin miimamik. Ne yo Pol pun uuwowa fain aawep nia asipami soomarem-miawiyem.

Pol uuwowa yoowa aawok nain maek

24 Aria yo aakisa ni muuta nain yoowa aawiyem fain pun eliwa-ke. I Krais teeria unowa nain ona mia ara saarik ikemik. Krais ona teeria muuta yoowa aawowa nain me wiar weeserowa ikua. Ne aakisa yo yoowa aawiyem fain Krais teeria yoowa aawemik nain wiar puowawiyem. 25 Ne Mua Maneka ona efa pepekimep ona opora nia maakowa uuwowa nain yo mia-pa efar wuak. Naeya yo ni Yeesus teeria uuwow mua niar arem. 26 Opora eena iiriw kokot ikua nain wi iiriw mua me amisaremik, ekapep aakisa epa fain i Yeesus opora wiar opamik nain ona yia maakeya amisaremik. 27 Opor kokot nain feenap, Mua Maneka ona kookalowa-pa opora nain miiw unowa pun nia maakiwkin feenap amisarowen, Krais anane ni niamiya ikaiya. Ne wiimar o mia parin onaiya ne unum maneka naap imenariya nain nis pun naap imenarowen. 28 I anane Krais opor eliwa emeria mua unowa wia maakimik. Wia maakemi baliwep kema suuwap opora baliwep akena wia ookomami ifana wiarimik. Naap oni-ikim-ikemkun wi mua unowiya Krais wameiya ikok Mua Maneka mokoka-pa dubil akena ikaikuan naep. 29 Yo nain naep uuwow yoowa fain kekanep naap uuw-ikim-ikaiyem. Krais ona kekanow maneka onaiya efa kekanowam-ikaeya uuwiyem.